有人話「唔係適唔適合，而係願唔願意去磨合」- 我對呢句說話有所保留。
曾經我以為Love can conquer all，覺得就算遇到咩困難都好只要撐過去就會得到幸福。但係事實最後話俾我聽呢啲係我一廂情願嘅諗法。因為當你愛錯人，無論點樣走落去都係徒勞無功；揀咗條錯嘅路行點樣都唔會俾你去到目的地。後來我就發現選擇比努力更加重要，起碼揀到啱嘅人就算意見唔啱嘅時候都唔會牛頭唔搭馬嘴溝通唔到。
咩先至叫做合適嘅人呢？
我相信現代版「門當戶對」。搵一個合適嘅人，講緊嘅並唔係大家都一齊鍾意食日本菜，大家都鍾意去打羽毛球，大家都好驚睇鬼片。我指嘅係同自己有差唔多背景、閲曆程度同埋價值觀嘅人。互相欣賞係保養愛情延續新鮮期嘅其中一個方法。如果大家嘅消費行為，工作選擇，理財方式同飲食習慣都有太大嘅差別，相處一段時間之後佢又埋怨你亂買嘢 (我用自己啲錢又唔係用你啲錢) ，你又投訴佢成日掛住同佢啲friend去飲酒 (我同啲兄弟去飲嘢又唔係去溝女) ... 咁樣落去大家只會覺得對方越嚟越煩，有時連講都唔想再講落去，漸漸就會失去互相欣賞對方嘅眼光。最後大家就會為咗唔想再同佢嘈 (因為講極佢都唔明) 嘅情況底下編一啲美麗嘅謊言一啲white lies去成全自己。咁最後結局我都唔需要多講啦... 有啲嘢你暪得幾多次呀。如果大家都係唔同牌子嘅鐘錶零件都可以用時間慢慢磨合令新錶運行，但係而家講緊嘅係你係電子錶零件我係行針錶零件點樣都唔會夾得埋㗎喎！
另外一種嘅係當大家都唔接受對方嗰套嘅時候「主從關係」就會產生。覺得自己有理嘅一方會堅持: 「你信我講啦，我咁樣做都係為你好，如果你成日都咁諗我哋將來點樣一齊行落去呀？」而比較弱勢嘅一方就算唔明白對方嘅道理都會覺得：「佢應該係為我好先會咁講，佢叫我唔好去就唔好去囉... 亦唔想因為自己堅持而令佢唔再愛我。」人可以放低執着學習接受新事物，謙虛聆聽嘗試理解新概念，但係就唔可以放低自我價值觀。如果因為磨合唔到而被迫改變自己嘅價值觀失去自我，你唔能夠做返你自己你開心咩？
咁有啲咩方法可以令你去考量究竟對方係咪同一系列嘅零件，係可以磨合定話其實係唔適合呢？我覺得第一個可以觀察嘅係當大家遇到拗撬遇到觀點角度唔同嘅時候，雙方如果最後可以將問題好平靜坦誠咁攞出嚟傾，諒解對方嘅想法一人讓一步而作出雙方都覺得舒服嘅解決方案就係遇到合適嘅人。我覺得呢一種先至叫做磨合。當然磨合都要經過好耐嘅時間同討論先至可以磨出一啲嘅成果，但係起碼你知道大家同一個Channel就一定磨得郁。第二就係如果遇到改變都要係自己覺得舒服嘅。磨合係一個compromise，唔係一個forced change。我曾經試過強迫人為我改變，將自己嗰套套落人哋身上最後迫走咗人；亦曾經失去自我聽晒對方講變成「主從關係」，失去自主權一啲都唔開心。如果你最後真係發現佢係一個唔適合磨合嘅人我勸你就唔好再曬自己時間。雙方如果產生唔到共同信念同生活模式，辛苦嘅就只有自己。只為適合嘅人磨合，只為值得嘅人調整自己。
不過其實喺以前嘅年代差唔多所有嘅婚姻都係被安排，有時我都會喺到諗：究竟佢哋嗰種係真愛嘅磨合呀，定話係無得揀嘅夾硬嚟呢！？喺時代進步資訊爆炸嘅年代，越站喺時代前線嘅人就越著重個人感受同選擇。有好多野其實都無對錯嘅，有時人哋嗰套方法你未必啱用，所有最緊要係唔好俾啲唔好嘅人影響自己情緒，用自己嘅方法令自己開心。祝你每天快樂！
Search